Irena Hristov, Author at Europe House

Автор: Irena Hristov

Носи ја промената – целогодишна платформа за родова еднаквост

Posted on by Irena Hristov

Секоја трета жена во Северна Македонија над 15 годишна возраст доживеала вознемирување или насилство. Земјата има една од највисоките стапки на фемицид во Европа. Жените заработуваат 12% помалку од мажите и извршуваат 72,5% од неплатената работа и грижа во домот.

Зад овие бројки се крие реалност со која живееме секој ден и на која речиси и не реагираме. Жена која ја напуштила работата во која била успешна затоа што грижата во домот по автоматизам е нејзина обврска. Пријава за закани што била поднесена, но не водела никаде. Просторија во која се носат одлуки, а нема ниту една жена. Ништо од ова не смее да помине. Ниту еднаш.

Токму затоа „Тимот Европа“ (анг. Team Europe – амбасадите на земјите членки на ЕУ) и Делегацијата на ЕУ ја започнаа кампањата „Носи ја промената“. Не станува збор за уште едно одбележување на Меѓународниот ден на жената, туку за кампања што се спроведува во текот на целата година, низ целата земја — од март до 16-те дена активизам во ноември.

Надополнета со впечатливиот уметнички израз на популарната локална илустраторка Руки Чуки, кампањата патува од град до град: Скопје, Велес, Тетово, Струга, Битола, Струмица. Во секој град, амбасадори на земјите членки на ЕУ седнуваат на иста маса со организации на граѓанското општество, претставници на општините и органите за спроведување на законот, да ги отворат разговорите на седум комплексни локализирани теми:

Кој ја плаќа сметката

Пробиениот штит

Празното столче

Невидливата пациентка

Бескрајната смена

Жетвата без нејзиното име

Кој ја програмира иднината

За еднаквоста не се одлучува само во рамките на институциите. Таа се одредува и според тоа кој ја добива работата и кој напредува, според тоа дали една жена на интервју за работа ќе биде прашана дали планира да има деца, според тоа кој родител останува дома кога детето е болно. Кој зборува на состанокот, а кој е постојано прекинуван. Но, и според тоа што се случува кога жена ќе каже дека некој ѝ се заканува, и дали некој го сфаќа тоа сериозно.

Законот опфаќа дел од ова. За останатото сме одговорни сите ние.

Кога законот не се применува, прашај ја институцијата зошто и пријави го тоа. Не го третирај насилството во семејството како приватна работа.

Носи ја промената таму каде што си. Дома, на работа, во просторијата каде што се носат одлуки.

Линкови:

Скопје, март – Кој ја плаќа сметката: Цената на нееднаквоста

Велес, април – Пробиениот штит: Родово базираното насилство и институционалната заштита

Тетово, јули – Празното столче: Жените во политиката

Струга, јули – Кој ја плаќа сметката: Цената на нееднаквоста

Приказна за земјата, паметењето и заедништвото: филмот „Земјиште“ премиерно во Прилеп и Битола

Posted on by Irena Hristov

Со поддршка од Europe House Bitola, а во соработка со Атриум, пред битолската и прилепската публика премиерно беше прикажан партиципативниот филм „Земјиште“, создаден преку колективен авторски процес. Премиерните проекции, одржани на Камената бина во Прилеп на 26 август и на малото плато пред Офицерскиот дом во Битола на 27 август, на присутните им понудија едно поинакво филмско доживување.

Филмот отвора размислувања за земјата – како концепт, симбол и простор надвор од јасно определено време – но и за човекот, како привремен дел од нејзиниот континуитет.

По проекциите следеа отворени и инспиративни разговори меѓу колективот што стои зад филмот и публиката. Се разговараше за идејните рамки од кои тргнал процесот на создавање, начинот на кој филмот бил сниман и приказните и одлуките што стојат зад она што го гледаме на екранот. Дискусијата ги отвори и прашањата што произлегуваат од самото филмско дело – од сцените и постапките на ликовите до начинот на кој визуелниот јазик ја гради приказната.

За филмот

Едно наследено, исцрпено парче земја ја носи тивката меморија на пет жени кои со години се враќаат за да копаат, да јадат и да си заминат, повторувајќи ритуал што одамна ја загубил смислата, но не и формата.

Рутината се урива кога една од нив го продава својот дел од имотот, верувајќи дека на тој начин се ослободува, а всушност тивко го поместува темелот врз кој се потпира нивното заедништво.

Авторски тим

Играат: Јасна Весиќ, Татјана Јовановска, Христина Србиноска, Софија Кутлешовска, Ана Тамбура

Асистенти на сет: Андреа Гроздановска и Михаил Спасевски

Режија и монтажа: Ивана Мирчевска
Сценарио: Калија Киселички
Камера: Исток Чаповски
Анимација: Ивана Мирчевска
Дизајн на звук: Марко Рикалоски
Продуцент: Дино Чупевски

Три земји, една планина: „Балкан без граници“ повторно ги собра планинарите на Беласица

Posted on by Irena Hristov

На Беласица, кај врвот Тумба (Тромеѓе), повторно се сретнаа љубителите на планината од Северна Македонија, Бугарија и Грција, во рамки на 26. издание на традиционалниот меѓународен планинарски собир „Балкан без граници“, во организација на Планинарското друштво „Ентузијаст“ од Струмица.

Како и секоја година, учесниците заедно се искачија до врвот Тумба, на 1.881 метар надморска височина – место каде што се среќаваат границите на трите соседни држави. Врвот со својата симболика потсетува дека природата и спортот можат да бидат простор за средба, размена и соработка, без оглед на границите.

Заедничкото искачување, дружењето и времето поминато во природа уште еднаш покажаа дека планините не нè разделуваат – тие нè поврзуваат.

Europe House Strumica со задоволство го поддржа настанот, кој повеќе од две децении го промовира планинарењето и пријателството, создава можности за нови средби и ги поврзува луѓето од регионот.

По патот на јагулата со кајак – уште една летна авантура на Црн Дрим!

Posted on by Irena Hristov

Денес Црн Дрим и Глобочичкото Езеро беа нашата рута, а кајакот беше најдобриот начин да ги доживееме од една сосема поинаква перспектива.

По повод Светскиот ден на младинските вештини, заедно со Спортски клуб Соларис Струга ја реализиравме турата „Патот на јагулата“, со која сакавме да покажеме дека Црн Дрим и Глобочичкото Езеро не се само дел од прекрасниот пејзаж, туку и простор што може да нè вмрежи, да нè поттикне на нови искуства и да понуди поинаков начин за доживување на околината на Струга.

Следејќи ја симболичната рута на европската јагула, учесниците имаа можност да ги совладаат основите на кајакарењето под водство на професионални инструктори, да стекнат практични вештини за безбедно движење на вода и одблиску да го запознаат природното богатство на Црн Дрим.

„Патот на јагулата“ беше можност да ја откриеме вредноста на локалните екосистеми, да научиме повеќе за биодиверзитетот што го прави овој регион единствен и да потсетиме дека зачувувањето на природата започнува со разбирање и лично искуство.

Доколку природата и јавниот простор ги користиме креативно и одговорно, можностите се навистина безбројни.

Од грижата за себе до активното учество во заедницата: Меѓународниот ден на младите во Кривогаштани и Прилеп

Posted on by Irena Hristov

Europe House Bitola го одбележа Меѓународниот ден на младите со две различни активности, на две различни локации, но со една заедничка цел – младите да се чувствуваат добро со себе, да бидат поврзани со другите и да знаат дека нивниот глас е важен.

Во соработка со Урбано гнездо, во Младинскиот центар – Кривогаштани се одржа работилницата за ментално здравје „Меѓу мислата и чувството“, водена од Марија Аџиоска Дунимаглоски, лиценциран психолог и основач на Психолошкиот центар „Раст и развој“. Работилницата отвори простор за разговор за внатрешниот свет на младите и понуди практични начини за постигнување посмирен ум, подобра регулација на емоциите и поздрав однос кон себе.

Од грижата за сопствената благосостојба до активното учество во заедницата – одбележувањето продолжи во Прилеп, каде што Europe House Bitola го поддржа локалниот Младински Совет Прилеп во реализацијата на формалниот и неформалниот дел од настанот.

Преку модерирана панел-дискусија, младите имаа можност да дознаат повеќе за локалните младински иницијативи, да разменат идеи и искуства и директно да се вклучат во разговорот за прашањата што ги засегаат.

По дискусијата, вечерта продолжи во поопуштено издание – со пинг-понг, дружење и DJ сет на Emily Nas.

Двете активности уште еднаш покажаа дека на младите им се потребни различни, но подеднакво важни можности – за разговор и саморефлексија, за дружење и забава, но и за активно учество и придонес во заедницата.

Затоа сме тука – да придонесеме кон заедница во која секој млад човек може да се чувствува поврзано, поддржано и слободно да го развива и остварува својот потенцијал.

Healing Hike – чекор поблиску до природата и наследството на Шар Планина

Posted on by Irena Hristov

Ден на Шар Планина што беше многу повеќе од обично пешачење.

Од Сидолскиот камен, преку бачилата во Шипковица, па сè до Гури и Лопеве, Healing Hike (Планинарење за благосостојба) ни понуди можност да се оддалечиме од градскиот метеж, да забавиме и да се поврземе со природата, локалната заедница и богатото наследство на Шар Планина.

Пешачењето започна од Сидолскиот камен, а патеката продолжи кон бачилата во Шипковица. Таму, локалниот водич и професор Неџбедин Халити сподели приказни и интересни информации за историјата, традицијата и значењето на бачилата, како и за ботаничката градина.

Патот продолжи кон Каменот на Кравите, а секој чекор отвораше нов поглед кон планината и нејзиниот пејзаж.

Но, Healing Hike немаше за цел само да се помине патеката.  Вистинската цел беше поврзување – со природата, со локалните приказни и со луѓето околу нас. За моментите во кои ќе застанеме, ќе погледнеме наоколу и ќе го доживееме местото со сите негови слоеви – природни, културни и човечки.

Токму преку ваквите искуства ги градиме и негуваме вредностите што нè поврзуваат: заедништво, грижа за природата и почитување на културното наследство.

Затоа што понекогаш, за да се вратиме поблиску до себе, доволно е да направиме неколку чекори поблиску до природата.

Healing Hike беше организиран од Europe House Tetovo, UNSHMT и Планинарскиот клуб Тетова, со поддршка од Општина Тетово.

„RAVEL: Unravel” музички перформанс на Herzel – современа интерпретација на музиката на Морис Равел во Струга

Posted on by Irena Hristov

Што се случува кога музиката на Морис Равел ќе биде интерпретирана од перспектива на артист кој работи во областа на современата електронска музика?

Токму такво доживување ни понуди Александар Гроздановски – Herzel кој во Паркот на поезијата во Струга, го претстави „RAVEL: Unravel“, несекојдневен музички перформанс што ја смести музиката на еден од највлијателните композитори на 20 век во современ контекст.

Музиката на Равел повеќе од еден век ги надминува границите на класичната музика. Неговите композиции се препознатливи по прецизноста, богатата звучна палета и смелите идеи што и денес инспирираат музичари од различни жанрови ширум светот. Токму овие карактеристики беа појдовна точка за новото читање на неговото дело.

„RAVEL: Unravel“ не беше ниту класичен концерт, ниту електронски сет. Поврзувајќи ја композицијата на Равел со современата електронска продукција, Herzel создаде ново звучно искуство, отворајќи нов простор за слушање и доживување на Равел.

 

Настанот се реализираше во соработка со Drim Short Film Festival, а беше поддржан од Францускиот институт Скопје, Аgence Consulaire Bitola и почесната конзулка Калиопа Стилиновиќ, и Alliance Française de Bitola.

Перформансот беше дел од заедничката заложба француското културно наследство да се претстави пред нова публика преку современи уметнички форми – овозможувајќи музиката на Равел, создадена пред повеќе од еден век, повторно да прозвучи од една поинаква и свежа перспектива.

Од стара маица до нова приказна: Wear Your Art ги спои креативноста и одржливоста

Posted on by Irena Hristov

Што ако старата маица стане платно за нова приказна?

Токму тоа беше водечката идеја зад креативната поп-ап работилница Wear Your Art – Носи ја својата уметност, која Europe House Strumica ја организираше во соработка со Гнездо од Кочани, Томислав и Симон. На работилницата, старите маици добија сосема нов живот – наместо да завршат како отпад, ги претворивме во уникатни парчиња облека.

Со помош на текстилни бои и специјално подготвени шаблони, учесниците создаваа свои дизајни инспирирани од некои од најзагрозените животински видови во нашата држава и на Балканот – балканскиот рис, белоглавиот мршојадец, кадравиот пеликан, речната видра, кафеавата мечка и балканската дивокоза.

Секој отпечаток беше повеќе од уметност – беше потсетник дека креативноста може да биде моќен начин да зборуваме за одржливоста и заштитата на природата, но и да ги претвориме во практика.

А потребата за вакви идеи е голема. Во светски рамки, секоја година околу 92 милиони тони текстилен отпад завршува во депонија. Голем дел од облеката што ја фрламе може повторно да добие живот – како ново парче, со нова намена или нова приказна.

Wear Your Art покажа дека одржливоста не мора да биде само сериозна тема за разговор. Таа може да биде креативна, забавна и лична – нешто што започнува со лична одлука и носи наш личен печат.

„Сликај и поврзи се“ – една композиција, различни уметнички интерпретации

Posted on by Irena Hristov

Што се случува кога една иста композиција ќе ја погледнат различни очи? – Се појавуваат различни приказни, со различни бои, перспективи и уметнички израз.

Меѓу боите, формите и разговорите, Europe House Bitola создаде простор за дружење, слободно изразување и откривање на сопствениот креативен поглед преку работилницата „Сликај и поврзи се“ (Paint and Connect).

Учесниците имаа можност да истражуваат различни начини на визуелно изразување, да експериментираат со стилови и техники и, пред сè, да уживаат во пријатна и опуштена атмосфера.

Посебниот предизвик на работилницата беше да се тргне од една заедничка композиција поставена во просторот, која секој учесник ја преточи на платно на свој начин. Инспирирани од кубизмот, експресионизмот, поп-артот, надреализмот и апстракцијата, учесниците создадоа различни интерпретации на истата сцена – секоја со свој стил, перспектива и личен печат.

Различни стилови и погледи – една заедничка композиција.

А можеби токму тоа беше и најубавата порака на работилницата: дека понекогаш не е потребно да ја промениме сликата пред нас. Доволно е само да погледнеме од друг агол.

Subscribe To our newsletter!