Irena Hristov, Author at Europe House - Page 4 of 4

Автор: Irena Hristov

Од стара маица до нова приказна: Wear Your Art ги спои креативноста и одржливоста

Posted on by Irena Hristov

Што ако старата маица стане платно за нова приказна?

Токму тоа беше водечката идеја зад креативната поп-ап работилница Wear Your Art – Носи ја својата уметност, која Europe House Strumica ја организираше во соработка со Гнездо од Кочани, Томислав и Симон. На работилницата, старите маици добија сосема нов живот – наместо да завршат како отпад, ги претворивме во уникатни парчиња облека.

Со помош на текстилни бои и специјално подготвени шаблони, учесниците создаваа свои дизајни инспирирани од некои од најзагрозените животински видови во нашата држава и на Балканот – балканскиот рис, белоглавиот мршојадец, кадравиот пеликан, речната видра, кафеавата мечка и балканската дивокоза.

Секој отпечаток беше повеќе од уметност – беше потсетник дека креативноста може да биде моќен начин да зборуваме за одржливоста и заштитата на природата, но и да ги претвориме во практика.

А потребата за вакви идеи е голема. Во светски рамки, секоја година околу 92 милиони тони текстилен отпад завршува во депонија. Голем дел од облеката што ја фрламе може повторно да добие живот – како ново парче, со нова намена или нова приказна.

Wear Your Art покажа дека одржливоста не мора да биде само сериозна тема за разговор. Таа може да биде креативна, забавна и лична – нешто што започнува со лична одлука и носи наш личен печат.

„Сликај и поврзи се“ – една композиција, различни уметнички интерпретации

Posted on by Irena Hristov

Што се случува кога една иста композиција ќе ја погледнат различни очи? – Се појавуваат различни приказни, со различни бои, перспективи и уметнички израз.

Меѓу боите, формите и разговорите, Europe House Bitola создаде простор за дружење, слободно изразување и откривање на сопствениот креативен поглед преку работилницата „Сликај и поврзи се“ (Paint and Connect).

Учесниците имаа можност да истражуваат различни начини на визуелно изразување, да експериментираат со стилови и техники и, пред сè, да уживаат во пријатна и опуштена атмосфера.

Посебниот предизвик на работилницата беше да се тргне од една заедничка композиција поставена во просторот, која секој учесник ја преточи на платно на свој начин. Инспирирани од кубизмот, експресионизмот, поп-артот, надреализмот и апстракцијата, учесниците создадоа различни интерпретации на истата сцена – секоја со свој стил, перспектива и личен печат.

Различни стилови и погледи – една заедничка композиција.

А можеби токму тоа беше и најубавата порака на работилницата: дека понекогаш не е потребно да ја промениме сликата пред нас. Доволно е само да погледнеме од друг агол.

From Peaks to Paws – од стари алпинистички јажиња до нови поводници за кучиња

Posted on by Irena Hristov

Понекогаш, од нешто старо и дотраено може да создадеме нешто корисно, убаво и со нова приказна.

Токму тоа го покажавме на креативната upcycling работилница „From Peaks to Paws“ (Од планинските врвови до шепите) која Europe House Skopje ја организираше на Средно Водно, во соработка со Алпинистички клуб Скопје и ЈП Лајка – Скопје.

Секое алпинистичко јаже има свој животен век. Кога повеќе не е безбедно за користење при качување, најчесто станува отпад. Но, неговата приказна не мора да заврши тука.

На работилницата, јажињата што ја завршија својата мисија на карпите добија нова намена – како цврсти и шарени поводници за кучињата згрижени во ЈП Лајка.

Преку креативна работа и практични вештини, учесниците покажаа дека циркуларната економија не мора да остане само идеја или концепт. Таа може да започне со нешто што веќе го имаме, малку креативност и желба да му дадеме нова вредност на нешто што инаку би завршило како отпад.

А најубавиот дел од приказната дојде на крајот – учесниците изработија вкупно 53 поводници, а кучињата од Лајка имаа можност лично да си го одберат својот нов поводник.

Со секое изработено парче придонесовме кон намалување на отпадот, претворивме стар материјал во нешто корисно, и овозможивме подобра грижа за згрижените животни.

Благодарност до сите што кроеја, плетеа, учеа, донираа и споделија дел од своето време и знаење.

Затоа што циркуларната економија може да започне и со мали промени. Во случајов – со неколку стари јажиња и идеја да им дадеме нов живот и нова намена.

Canvas Conversations: една поинаква летна вечер во Велес исполнета со уметност, инспирација и добро вино

Posted on by Irena Hristov

По втор пат во Europe House Veles ги споивме платното, боите, локалното вино и доброто друштво во една поинаква летна вечер, исполнета со креативност, разговори и нови искуства.

На Canvas Conversations Vol. 2, секој учесник имаше простор да експериментира, да создава и да го пронајде својот израз, без разлика дали првпат држи четка во рака или веќе има искуство со сликање. Низ процесот на сликање ги водеше уметничката Елена Димова, која им помогна на учесниците своите идеи да ги претворат во сопствени уметнички дела.

Вечерта ја збогати и Old School Winery, мала семејна винарија од Велес, која ги претстави своите две нови вина и ја сподели приказната зад нивното создавање – уште еден начин локалните приказни да станат дел од нашите заеднички искуства.

Но, Canvas Conversations не беше само за сликање или дегустација. Беше вечер за дружење, споделување идеи и создавање нешто заедно. За моментите кога се опуштаме, пробуваме нешто ново и си дозволуваме да го изразиме својот креативен потенцијал.

Затоа што креативноста не е резервирана само за уметниците. Таа е за секој што е подготвен да проба, да создава и да ужива во процесот.

Canvas Conversations ни покажа дека понекогаш најубавите приказни започнуваат со празно платно, чаша вино и добро друштво.

 

Кога модата раскажува историја: традицијата и идентитетот на Полошкиот регион

Posted on by Irena Hristov

Што може да ни каже модата за историјата, традицијата и идентитетот на еден регион? Одговорите ги откривме преку изложбата „Историјата на полошката мода“, поставена во Europe House Tetovo.

Преку автентични приказни и модни елементи од различни историски периоди, изложбата ја следи еволуцијата на модата во Полошкиот регион и покажува како облеката и традиционалните елементи стануваат дел од културниот идентитет и наследство.

Зад изложбата стои младиот Арѓенд Османи, чија посветена работа придонесува кон истражување, зачувување и промоција на културното наследство на Полошкиот Регион. Неговата иницијатива покажува дека младите имаат важна улога во откривањето на локалните приказни и нивното доближување до новите генерации.

„Историјата на полошката мода“ нè потсети дека секој традиционален елемент носи своја приказна – за времето, луѓето и местото од кое потекнува.

Грижата за пчелите е грижа за природата – учиме за одржливо пчеларство и заштита на биодиверзитетот

Posted on by Irena Hristov

Еден ден исполнет со нови знаења, практични искуства и инспирација за тоа како сите можеме да придонесеме за заштита на пчелите и биодиверзитетот.

Во рамки на работилницата организирана од Europe House Strumica, jа посетивме пчеларската фарма и апи-тераписки центар Алчинов во регионот на Гевгелија, каде што се запознавме со традицијата на пчеларството и важноста на пчелите за природата и одржливоста.

Одблизу ги запознавме пчелните семејства, научивме како пчеларите се грижат за кошниците и зошто пчелите се клучни за зачувување на биодиверзитетот.

Ја посетивме и апи-комората, каде што го почувствувавме светот на пчелите, вдишувавме природен воздух од кошниците и се запознавме со различни пчелни производи.

И најважно, научивме дека грижата за пчелите е грижа за природата и за нашата одржлива иднина.

Пчелите се едни од најважните чувари на природната рамнотежа. Тие го овозможуваат опрашувањето на голем дел од растенијата и придонесуваат за зачувување на биодиверзитетот и храната што секојдневно ја имаме на нашите трпези.

Но, денес, тие се соочуваат со сè поголеми предизвици – климатските промени, губењето на природните живеалишта и прекумерната употреба на пестициди претставуваат сериозна закана за нивниот опстанок.

Затоа е важно да ги препознаеме и поддржиме луѓето кои секојдневно, преку одржливо пчеларство, работат на нивната заштита и зачувување на природната рамнотежа.

Subscribe To our newsletter!