Lajme nga Europe House Strumicë Archives - Europe House

Dita Botërore e Fëmijëve: Turne mini-basketbolli me dimension humanitar në Makedonska Kamenicë

Me rastin e Ditës Botërore të Fëmijëve, u bashkuam në Makedonska Kamenicë, ku Europe House Veles dhe Europe House Strumica mbështetën Karvanin e Mini-basketbollit – një projekt kushtuar basketbollistëve më të vegjël, i organizuar në bashkëpunim me Federatën e Basketbollit dhe partnerët lokalë.

Fusha e basketbollit në Shkollën Fillore Komunale “Shën Kirili dhe Metodi” u shndërrua në një hapësirë të mbushur me energji pozitive dhe frymë ekipore, ku u takuan ekipe të reja të basketbollit nga mbarë vendi.

Përveç ndeshjeve emocionuese, përgatitëm edhe një kënd të veçantë të Europe House, ku pjesëmarrësit më të vegjël patën mundësinë të vënë në provë aftësitë e tyre përmes sfidave të vogla sportive, gjuajtjeve të lira dhe aktiviteteve të tjera argëtuese.

Por, kësaj radhe luajtëm edhe për një qëllim më të madh – të ndajmë gëzimin edhe me ata që kanë më shumë nevojë për të. Në bashkëpunim me Kryqin e Kuq – Dellçevë, organizuam një iniciativë humanitare, përmes së cilës i ftuam fëmijët të dhuronin vullnetarisht lodra të ruajtura mirë. Secila lodër u paketua si dhuratë dhe u shoqërua me një mesazh personal nga fëmija që e dhuronte. Këto dhurata të vogla më pas iu dhuruan fëmijëve nga kategoritë e cenueshme. Në këtë mënyrë, pjesëmarrësit më të vegjël treguan se basketbolli nuk është vetëm lojë dhe garë, por edhe një hapësirë ku zhvillohen empatia dhe ndjenja e bashkësisë.

Përmes kësaj iniciative, synuam të nxisim te sportistët e rinj solidaritetin, kujdesin dhe mbështetjen e ndërsjellë. Sepse çdo fëmijë meriton një fëmijëri të mbushur me lojë, gëzim, miqësi dhe mundësi. Dhe ndonjëherë, mënyra më e bukur për ta ndarë atë gëzim është të dhurojmë një pjesë të gëzimit tonë.

“Të korrat pa emrin e saj” në Europe House Strumicë: Diskutim për gratë rurale dhe punën e tyre të padukshme

Mbi 38.000 gra në Maqedoninë e Veriut janë të regjistruara si fermere, por shumë prej tyre nuk kanë qasje të barabartë në siguri financiare, pushim të lehonisë, sigurim shëndetësor dhe mbrojtje sociale. Këto sfida ishin në fokus të diskutimit të djeshëm në panelin “Të korrat pa emrin e saj: Gratë rurale dhe puna e padukshme”, i cili u mbajt në Europe House Strumicë.

Ngjarja u organizua në kuadër të fushatës “Vish ndryshimin” (Wear the Change), të iniciuar nga Delegacioni i Bashkimit Evropian dhe ambasadat e shteteve anëtare të BE-së, të bashkuara në #TeamEurope, si pjesë e karvanit kombëtar. Diskutimi krijoi hapësirë për të folur mbi pengesat sistemike dhe institucionale, por edhe mbi paragjykimet dhe pabarazitë që ua kufizojnë grave në zonat rurale qasjen në të drejtat e tyre.

Gratë fermere kontribuojnë në prodhimin e ushqimit dhe në ekonominë rurale, ndërsa njëkohësisht shpesh kujdesen edhe për shtëpinë. Megjithatë, puna dhe kontributi i tyre shpesh mbeten jashtë kornizave formale ekonomike dhe institucionale. Veçanërisht shqetësuese është qasja në pronë dhe tokë: në vitin 2021, vetëm 4,1 për qind e grave në zonat rurale figuronin si pronare të pronave, ndërsa në nivel kombëtar vetëm 12 për qind e grave kanë në pronësi tokë.

Në diskutim u trajtuan shkaqet e këtyre pabarazive, përfshirë edhe praktikat që lidhen me trashëgiminë. Edhe pse vajzat kanë të drejtë ligjore për të trashëguar, ato shpesh heqin dorë nga pjesa e tyre në favor të vëllezërve. Në këtë ndikojnë traditat e kahershme dhe pritshmëria se, pas martesës, vajza do t’i “përkasë një familjeje tjetër”.

Në diskutim morën pjesë Veronika Ioana Çolka, zëvendësshefe e misionit të Ambasadës së Rumanisë; Lejla Rajkova, avokuese e të drejtave të grave rurale dhe e bujqësisë lokale; dhe Liljana Jonovski, profesoreshë e asociuar në Fakultetin në Kërçovë dhe eksperte për përfshirjen e grave në jetën publike, me fokus te zonat rurale. Diskutimin e moderoi Andrea Ugrinoska nga “Tiiiiit! Inc.” – Shkup.

Panelistet shqyrtuan sfidat me të cilat përballen gratë që jetojnë dhe punojnë në zonat rurale, zbatimin e ligjeve dhe mekanizmat e disponueshëm të mbështetjes. U diskutua edhe për përvojën e Rumanisë, si një vend me pjesëmarrje të konsiderueshme të fuqisë punëtore në bujqësi, si dhe për rolin e Bashkimit Evropian në avancimin e të drejtave të grave rurale.

Diskutimi përfshiu edhe pengesat shoqërore dhe kulturore që vazhdojnë të ekzistojnë krahas kornizave ligjore, si dhe mënyrat se si institucionet dhe komunitetet mund të kontribuojnë në krijimin e mundësive të barabarta. Pas panelit, edhe publiku u përfshi në diskutim përmes sesionit me pyetje dhe përgjigje.

Mesazhi kryesor i diskutimit ishte se kontributi i grave fermere duhet të njihet dhe të shoqërohet me të drejta dhe siguri të barabarta. Sigurimi i qasjes në pronë, sigurim shëndetësor e social dhe në të drejtat që lidhen me punën është një hap i rëndësishëm drejt një shoqërie më të drejtë dhe të qëndrueshme.

Përmes karvanit “Vish ndryshimin”, Delegacioni i Bashkimit Evropian, ambasadat e shteteve anëtare të BE-së dhe rrjeti i Europe House vazhdojnë të hapin diskutime publike për barazinë gjinore dhe të drejtat e grave në mbarë vendin.

Mbill shpresë: Një kopsht gjithëpërfshirës në Koçan, simbol i solidaritetit dhe kujdesit për njëri-tjetrin

Në Koçan mbollëm më shumë se lule. Krijuam një hapësirë të re për shoqërim, bashkim dhe kujdes, ku çdo bimë përcjell një mesazh pranimi, barazie dhe respekti.

Në kuadër të nismës Mbill shpresë (Planting Hope), Europe House Strumica, në partneritet me ZOI Koçan, bashkoi nxënësit e Shkollës Fillore “Nikolla Karev” dhe personat me aftësi të kufizuara, anëtarë të ZOI-t, në një punëtori gjithëpërfshirëse mjedisore. Së bashku mbollëm lule dhe gjelbërim në oborrin e shkollës, ndërsa vazot i zbukuruam me mesazhe miqësie, shprese, barazie dhe respekti të ndërsjellë.

Kështu lindi Kopshti i Gjithëpërfshirjes – një kënd i vogël i gjelbër që do të rritet së bashku me komunitetin dhe do të na kujtojë se çdo njeri meriton mbështetje, mundësi të barabarta dhe hapësirë për t’u zhvilluar dhe për të kontribuar. Çdo bimë e mbjellë u bë simbol i solidaritetit, vlerave të përbashkëta dhe dashurisë.

Mbill shpresë është pjesë e nismës Green Up, e cila nxit ndërgjegjësimin mjedisor dhe krijimin e komuniteteve më të bukura e më të gjelbra përmes hapave të vegjël, por domethënës. Sepse ndryshimi nuk fillon vetëm me atë që mbjellim, por edhe me mënyrën se si kujdesemi për njëri-tjetrin.

Kafe me ambasadorët në Strumicë – dialog për bujqësinë, zhvillimin rural dhe të ardhmen evropiane

Dje, në Europe House Strumicë, u mbajt edicioni i radhës i “Kafe me Ambasadorët”, i cili këtë herë iu kushtua temës “Bujqësia dhe zhvillimi rural”, me pjesëmarrjen e ambasadores së Republikës Federale të Gjermanisë, Sh.S. Petra Dreksler, dhe ambasadores së Mbretërisë së Holandës, Sh.S. Ozlem Xhanel.

Së bashku me bujqit, përfaqësuesit e sektorit akademik dhe të organizatave joqeveritare nga rajoni, ngjarja hapi një diskutim mbi rëndësinë e bujqësisë në ekonomitë moderne evropiane, përvojat e Gjermanisë dhe Holandës, si dhe mundësitë që integrimi evropian sjell për bujqit dhe zonat rurale në Maqedoninë e Veriut.

Strumica, si një nga rajonet më të rëndësishme bujqësore në vend, është një vend i natyrshëm për të zhvilluar një diskutim mbi një sektor që nuk përfaqëson vetëm një veprimtari ekonomike, por është gjithashtu një pjesë e rëndësishme e identitetit lokal, traditës dhe jetës së përditshme.

Në kuadër të diskutimit, vëmendje e veçantë iu kushtua Politikës së Përbashkët Bujqësore të Bashkimit Evropian (CAP) dhe rëndësisë së saj praktike për bujqit. U diskutua se si politikat evropiane bujqësore ndikojnë në prodhimin, mbështetjen për bujqit, standardet mjedisore dhe zhvillimin e komuniteteve rurale, si dhe çfarë do të nënkuptonte përfshirja në këtë sistem për prodhuesit e vegjël dhe të mesëm bujqësorë në Maqedoninë e Veriut.

Ambasadoret ndanë përvojat e Gjermanisë dhe Holandës në përballjen me një nga sfidat më të mëdha të bujqësisë moderne: si të ruhet produktiviteti i lartë, duke mbrojtur njëkohësisht tokën, ujin, biodiversitetin dhe mjedisin.

Diskutimi përfshiu gjithashtu sfidat që lidhen me bujqësinë e qëndrueshme, ndryshimet klimatike dhe nevojën për t’u përshtatur me kushtet e reja, pa ulur konkurrueshmërinë. Inovacionet dhe e ardhmja e bujqësisë gjithashtu zunë një vend të rëndësishëm në diskutim. U shqyrtuan përvojat me bujqësinë precize, teknologjitë e serrave, digjitalizimin, kërkimin shkencor dhe kooperativat bujqësore, si modele që mund të kontribuojnë në rritjen e efikasitetit dhe në një prodhim më të qëndrueshëm.

Vëmendje e veçantë iu kushtua edhe potencialit të rajonit të Strumicës, i cili disponon tokë pjellore, një traditë të fuqishme në prodhimin e perimeve dhe një pozicion të favorshëm ndaj tregjeve rajonale. Gjatë diskutimit u theksua rëndësia që këto avantazhe të zhvillohen më tej përmes më shumë njohurive, teknologjive, bashkëpunimit dhe qasjes në mundësitë evropiane për zhvillim.

Përmes përvojave të Gjermanisë dhe Holandës, pjesëmarrësit patën mundësinë të dëgjojnë se si politikat evropiane zbatohen në praktikë dhe çfarë mundësish, ndryshimesh dhe përgjegjësish ato sjellin për bujqit dhe komunitetet rurale. Ngjarja përfundoi me një diskutim mbi të ardhmen e bujqësisë në vend, përmes zbatimit të inovacioneve, praktikave të qëndrueshme, organizimit më të mirë dhe shfrytëzimit të instrumenteve evropiane të mbështetjes.

“Kafe me Ambasadorët” është pjesë e aktiviteteve të Europe House, të orientuara drejt krijimit të hapësirës për dialog mbi politikat, përvojat dhe vlerat evropiane dhe rëndësinë e tyre praktike për qytetarët dhe komunitetet lokale në mbarë Maqedoninë e Veriut.

Tri vende, një mal: “Ballkani pa kufij” bashkon sërish alpinistët në Belasicë

Dashamirësit e alpinizmit nga Maqedonia e Veriut, Bullgaria dhe Greqia u mblodhën sërish në malin Belasicë, pranë majes Tumba (Trekufiri), për edicioni e 26-të të tubimit tradicional ndërkombëtar të alpinizmit “Ballkani pa kufij”, organizuar nga Klubi Alpinistik “Entuziast” nga Strumica.

Si çdo vit, pjesëmarrësit u ngjitën së bashku drejt majes Tumba, në lartësinë 1.881 metra mbi nivelin e detit – një vend ku takohen kufijtë e tri shteteve fqinje. Me simbolikën e saj të veçantë, maja na kujton se natyra dhe sporti mund të krijojnë hapësira për takime, shkëmbim dhe bashkëpunim, pavarësisht kufijve.

Ngjitja e përbashkët, koha e kaluar së bashku dhe momentet në natyrë treguan edhe një herë se malet nuk na ndajnë – ato na bashkojnë.

Europe House Strumica ishte e kënaqur të mbështeste këtë aktivitet, i cili prej më shumë se dy dekadash promovon alpinizmin dhe miqësinë, krijon mundësi për takime të reja dhe afron njerëzit nga i gjithë rajoni.

Nga një bluzë e vjetër në një histori të re: “Wear Your Art” sjell së bashku kreativitetin dhe qëndrueshmërinë

Po sikur një bluzë e vjetër të shndërrohej në një kanavacë për një histori të re?

Kjo ishte ideja në qendër të punëtorisë kreative pop-up “Wear Your Art”, organizuar nga Europe House Strumica në bashkëpunim me Gnezdo nga Koçani, Tomislav dhe Simon. Gjatë punëtorisë, bluzat e vjetra morën një jetë të re – në vend që të përfundonin si mbetje, ato u shndërruan në veshje unike, të krijuara me imagjinatë dhe një prekje personale.

Me ndihmën e ngjyrave për tekstile dhe shablloneve të përgatitura posaçërisht, pjesëmarrësit krijuan dizajnet e tyre, të frymëzuara nga disa prej llojeve më të rrezikuara të kafshëve në vendin tonë dhe në Ballkan – rrëqebulli ballkanik, shkaba e zezë, pelikani kaçurrel, vidra e lumit, ariu i murrmë dhe dhia e egër ballkanike.

Çdo printim ishte më shumë se thjesht një krijim artistik. Ai ishte një kujtesë se kreativiteti mund të jetë një mënyrë e fuqishme për të folur për qëndrueshmërinë dhe mbrojtjen e natyrës, por edhe për t’i kthyer këto vlera në veprim konkret.

Dhe nevoja për ide të tilla është gjithnjë e më e madhe. Në mbarë botën, rreth 92 milionë tonë mbetje tekstili përfundojnë çdo vit në deponi. Një pjesë e madhe e rrobave që hedhim mund të përdoren përsëri dhe të marrin një jetë të dytë – si një veshje e re, me një qëllim të ri ose një histori të re.

“Wear Your Art” tregoi se qëndrueshmëria nuk ka pse të jetë vetëm një temë serioze për diskutim. Ajo mund të jetë kreative, argëtuese dhe personale – diçka që nis me një zgjedhje të thjeshtë dhe mbart gjurmën e secilit prej nesh.

Pse mbrojtja e bletëve është e rëndësishme për të ardhmen tonë: Të mësojmë për bletarinë e qëndrueshme

Një ditë e mbushur me njohuri të reja, përvojë praktike dhe frymëzim për mënyrën se si secili prej nesh mund të kontribuojë në mbrojtjen e bletëve dhe biodiversitetit.

Në kuadër të një punëtorie të organizuar nga Europe House Strumica, vizituam fermën e bletarisë dhe qendrën e apiterapisë Alchinov në rajonin e Gjevgjelisë, ku u njohëm me traditën e bletarisë dhe mësuam për rolin jetik që luajnë bletët në natyrë dhe në qëndrueshmëri.

Patëm mundësinë të shohim nga afër kolonitë e bletëve, të mësojmë se si bletarët kujdesen për kosheret dhe të kuptojmë pse bletët janë thelbësore për mbrojtjen e biodiversitetit.

Vizituam edhe hapësirën e apiterapisë, ku e përjetuam nga afër botën e bletëve, thithëm ajrin natyror nga kosheret dhe u njohëm me një shumëllojshmëri produktesh të bletëve.

Mbi të gjitha, mësuam se kujdesi për bletët do të thotë të kujdesemi për natyrën — dhe për një të ardhme të qëndrueshme.

Bletët janë ndër mbrojtëset më të rëndësishme të ekuilibrit ekologjik në natyrë. Ato pjalmojnë një pjesë të madhe të bimëve me lule, duke ndihmuar në ruajtjen e biodiversitetit dhe në sigurimin e ushqimit që çdo ditë mbërrin në tryezat tona.

Megjithatë, bletët po përballen me kërcënime gjithnjë e më të mëdha. Ndryshimet klimatike, humbja e habitateve natyrore dhe përdorimi i tepruar i pesticideve paraqesin rreziqe serioze për mbijetesën e tyre.

Prandaj, mbështetja për njerëzit që kujdesen për bletët çdo ditë dhe promovojnë bletarinë e qëndrueshme është njëkohësisht edhe një mënyrë për të mbrojtur ekuilibrin e ekosistemeve tona — dhe të ardhmen nga e cila varemi të gjithë.

Subscribe To our newsletter!