Study Abroad Fair Skopje 2026 ги претстави можностите за студирање во Европа - Europe House

9 Ное

BACK

Study Abroad Fair Skopje 2026 ги претстави можностите за студирање во Европа

Study Abroad Fair Skopje 2026 ги претстави можностите за студирање во Европа

Каде можеш да студираш во Европа? Како да аплицираш за стипендија? Кои се условите за упис и колку чини студентскиот живот во странство? Одговорите на овие и многу други прашања младите ги побараа на Саемот за студирање во странство за 2026 (Study Abroad Fair Skopje 2026), кој се одржа на 7 и 8 ноември во Skopje City Mall.

По саемите „Study Opportunities in the EU“, организирани во октомври во Europe House Битола и Europe House Тетово, настанот во Скопје привлече голем број средношколци и студенти, како и родители, заинтересирани за продолжување на образованието во странство.

Во соработка со Студентарија и со поддршка на Europe House Скопје, на едно место беа претставени можностите за студирање во повеќе европски земји – Грција, Бугарија, Унгарија, Чешка, Италија, Франција и Германија.

Посетителите можеа директно да разговараат со претставници на странски универзитети и факултети, да проследат информативни презентации и сесии, и да дознаат повеќе за студиските програми, условите за упис, можностите за стипендии, и трошоците за студирање.

Study Abroad Fair Skopje 2026 им овозможи на младите да добијат информации од прва рака, да постават прашања и да добијат корисни насоки, да ги споредат достапните студиски програми и да донесат информирани одлуки за својата иднина.

Студирањето во странство не е само можност за стекнување диплома. Тоа е и искуство што носи нови знаења, познанства, самостојност и пошироки перспективи. А секоја голема одлука полесно се носи кога имаш пристап до вистинските информации.

Преку ваквите иницијативи, Europe House продолжува да ги поврзува младите со образовните можности во Европската Унија и пошироко, поттикнувајќи ги активно да ги следат своите академски интереси и да ги претвораат своите амбиции во конкретни планови.

Subscribe To our newsletter!